सांगली : नूतन बुद्धिबळ मंडळातर्फे आयोजित सुवर्णमहोत्सवी बाबूकाका शिरगावकर स्मृती फिडे मानांकन खुल्या बुद्धिबळ स्पर्धेत देशभरातील २३५ बुद्धिबळपटू सहभागी झाले आहेत. बांधकाम व्यावसायिक एम. व्ही. कुलकर्णी, सुधा कुलकर्णी, व्यापारी प्रवीण शहा यांनी पटावरील चाल खेळून या स्पर्धेचे उद्घाटन केले.
स्पर्धेमध्ये महाराष्ट्र, कर्नाटक, राजस्थान, गोवा, तामिळनाडू, गुजरात, आंध्रप्रदेश, तेलंगणा या राज्यांमधून बुद्धिबळपटू सहभागी झाले आहेत. कस्टम विभागाचा आंतरराष्ट्रीय मास्टर अभिषेक केळकर, रेल्वेचा समीर कठमाळे, तामिळनाडूचा आर. बालसुब्रह्मण्यम, तामिळनाडूचा राजेश व्ही. ए. व्ही, रेल्वेचा एस. रवि. तेजा, फिडेमास्टर सौरभ खर्डेकर, मुंबईचा राकेश कुलकर्णी, पुण्याचा अनिरुद्ध देशपांडे, कोल्हापूरचा सम्मेद शेटे, पुण्याचा चिन्मय कुलकर्णी, नाशिकचा सुयोग वाघ, अहमदनगरचा संकर्षा शेळके, पुण्याचा सोहन फडके, पुण्याचा निखील दीक्षित, रेल्वेचा अमरदीप बारटक्के, कोल्हापूरचा अनिश गांधी, पुण्याचा प्रतीक मुळे, पृथु देशपांडे, राजस्थानचे ज्योतिप्रकाश शर्मा, गोविंद प्रसाद, सांगलीचे विजयकुमार माने, सदानंद चोथे, मुंबईचा चिराग सत्कार या नामांकितांसह १८० बुद्धिबळपटूंचा समावेश आहे. नितीन शेणवी, विवेक सोहनी, जयश्री पाटील, सूर्याजी भोसले, दीपक वायचळ हे पंच म्हणून काम पाहात आहेत.
अंध बुद्धिबळपटूचा सहभाग
ठाणे येथील आर्यन बी. जोशी हा अंध बुद्धिबळपटू स्पर्धेत खेळत आहे. स्पर्श ओळखून खेळण्याची त्याची पद्धत आहे. त्यामुळे त्याच्या खेळाकडे सर्वांचे लक्ष लागले आहे.